گنجور

 
صائب تبریزی
 

دوتما اول گل دامنین محشر گونینده جان ایچون

قیلما یوزسیزلیق نگارایلن بیر آووج قان ایچون

آچماگیل آغزین گورنده خال مشکین دانه سی

اگمه باش پرگار تک هر نقطه یه دوران ایچون

یولداش اولدورکیم قارا گونلرده یولدان چیخماسون

کسمه یولداشدان خضر تک چشمه حیوان ایچون

ینگی آی باشین اگر خورشیده تا اولسون تمام

ساده دل بیلمز که بسلر ئوزینی نقصان ایچون

مشرب ایچون قویماگیل الدن عنان اختیار

خام لیغدان آتینی ئولدورمه گیل میدان ایچون

حسن جولانیندان ال کسمکدور آروادلار ایشی

کس ئوزیندن مردلر تک یوسف کنعان ایچون

منت ایلن دیریلیک صائب ئولومدن دور بتر

جان ویرورلر اهل غیرت درد بی درمان ایچون

حاشیه‌ها

تا به حال حاشیه‌ای برای این شعر نوشته نشده است. 💬 شما حاشیه بگذارید ...

برای حاشیه‌گذاری باید در گنجور ثبت نام کنید و با نام کاربری خود از طریق آیکون 👤 گوشهٔ پایین سمت چپ صفحات به آن وارد شوید.