اَمیرْ گِنِهْ دَسْتِ فَلِکْ دٰاد وُ بی‌داد

چَمِنِّهْ وِنِهْ پٰادَرِهْ سُونِ فُولٰادْ

گٰاهی بَنْدِ تُرْک نِشینْ، گَهی بَنْدِ تٰادْ

یٰا شٰاهِ خِرٰاسُونْ بِرِس اَمِهْ فَرْیٰادْ

اَمیرْگِنِهْ کِهْ تِهْ چِشْ نَرْگِسِهْ یٰا جٰادْ؟

تِهْ بَرْفِهْ کِهْ هَرْ مٰاهِ هِلٰالْ بَوُو مٰادْ

مِهْ سُوتِهْ دِلِ دَنی‌رِهْ تُو هٰاکِنْ شٰادْ

چی بُونِهْ کِهْ تِهْ هٰادی مِنِهْ دِلِ دٰادْ؟

بَخْتی کِهْ جَمْشیدْ دٰاشْتِهْ اَمِهْ دَرْجا کِرْدْ

تَخْتی کِهْ جَمْشیدْ دٰاشْتِهْ، اَمِهْ هَمْپٰا کِرْدْ

اَمیرْ گِنِهْ تٰا ایزدْ دَنی بِهْ پٰا کِرْدْ

خٰال وُ خَطّ وُ خوُبی تِنِهْ تَنْ‌رِهْ جٰا کِرْدْ

اَمیرْ گِنِهْ: حٰالِ سَکِراتْمِهْ گُوهِرْ!

خِضْری حَسُودی نَکِنْ، بِرُو مِنِهْ سَرْ

مِنْ بَمِرْدْ نِیٰاوُونِمْ، دَوُونِمْ نَظِرْ

اَنْدی تِمٰا دٰارْمِهْ تِهْ بِیٰایی مِهْ وَرْ

اَمیرْ گِنِهْ: حٰالِ سَکِراتْمِهْ گُوهِرْ!

مِنْ تِهْ وَرْ اَمیرْ هَسْتْمِهْ، تُو مِهْ وَرْ گَوُهِرْ

تِهْ کَشِهْ گِلِهْ، گِلْ تُو بِیُورْدی نُو وِرْ

تِهْ دیم وُ سُوآلْ بَدْرِ مُنیرِهْ یٰا خِرْ؟

بِوٰارِمْ بِوٰارِمْ، چَنْ زَنّی بِهْ مِهْ‌سَرْ؟

بِوٰاشْ بِهْ سِلٰامِتْ، کَسْ نَمیرْنِهْ (نَمیره) تِهْ وَرْ

چٰاکْ زَمِّهْ شِهْ جوُمِهْ‌رِهْ زِ پٰایْ تٰا سَرْ

مِنْ خِذرِهْ دِرْیُو دِمِّهْ، تِنِهْ عِشْق وَز

اَمیر گِنِهْ: مِهْ دُورْ بَرِ سییِهْ آخِرْ

تَرْسِمْ اَجِلِ تیغْ حِوٰالِهْ بُو مِهْ سَرْ

قَفِسْ اِشْکِنِهْ مِرْغِ دِلْ، جٰا کِنِّهْ پَرْ

مِنِهْ نَئی رُوزْ، کی بِکَشِهْ جِفٰا تِرْ؟

اَمیرْ گِنِهْ اُونْطُورْ بِهْ تُو دٰارْمِهْ آزیز

یَعْقُوبْ بِهْ کَنْعُونْ شِهْ یُوسِفْ‌رِهْ دَرْ آویرْ

اُونْسُونْ وَرْزِمْ تِهْ مِهْرْ، کَسْ نِدٰارِهْ آزیرْ

چیرهْ خُورْآسٰا، جِهُونْ هِشِنْدییهْ نیرْ

مِهْ جٰانْ! مِنْ تِرِهْ داٰرْمِهْ، تُویی مِرِهْ داٰرْ

مِنْ تِهْ دِلْ نَیٰازاٰرْمِهْ، تُویی نَیٰازٰارْ

تُو مِهْ مِهْرِبُونْ دُوسْ بُو! مِنْ تِهْ بِفٰادٰارْ

دِشْمِنْ پِرْ زننْ سَرْ بِهْ سَنْگْ، دیمْ بِهْ دیفٰارْ

اَمیرْ گِنِهْ: دٰادْ بِهْ دَسِّ بی بِقٰا یٰارْ

دی وی مِهْرِبُونْ بییِهْ، اَمْرُو دِلٰازٰارْ

یِکْتا سِخِنِ وَرْ، دِنِهْ وی اَنْدی کٰارْ

مِهْ رُوشِنِهْ روُزْرِهْ هٰاکِرْدِهْ شُوی تٰارْ

پَئیزْ پَجِنی، ویهارِهْ مٰاهْ رهْ یاد دارْ

اَنْبونْ دُوشْ کِنّی، کِنّاکِنّارِهْ یاد دارْ

خُوشِهْ کهْ چنّیی، شِهْ وَرِهْکٰارِهْ یاد دارْ

روز قیامتْ، سَبْزِه قِوا (قِبا) رِهْ یاد دارْ

قالی سرنِشینْ (سر نیشتی) کُوبِ تِری‌رِهْ یاد دارْ!

امسال سیری، پارِ وَشْنی رِهْ یاد دارْ!

اسبِ زین سِوارْ! دُوشِ چَپی‌رِهْ یاد دارْ!

چَکْمِهْ دَکِرْدی، لینْگِ تَلی‌رِهْ یاد دارْ!

نِماشْتِرْ (سرا) سَرْ هِوا زمینْ بییهْ ترْ

منه خَرِهْ بار دَکِتِهْ گُوهِرِ دَرْ

گوهرْگِلِهْ دیمْ اِسَییهْ دیفار وَرْ

دَسْ زُوئِهْ، قَسِمْ خِرْدِهْ، اِسا، تِنِهْ سَرْ

گُوهرْ گِلِهْ دیمْ، مِهْ گِلِهْ دیمِهْ گُوهِرْ!

نه تَنْ گِلِهْ باغِهْ، گِلْ بیارْدِهْ نُووِرْ

هَرْکی دَرْ بیمُوئِهْ تِهْ باغِ گِلِ وَرْ

بَئُوکَلْ اَمیرْ دِکاشِتِهْ گُوهِرِ وَرْ

غَلْیُون خارْهَکِنْ گُوهِر به مثلِ شَکِرْ

شهْ دِلْ‌رِهْ به تو دِمِّهْ مِنْ شَوَمِهْ سفرْ

گُهر گِلِهْ دیمْ، نَکِنْ خیالِ دیگرْ

صَد سالْ بَمُّونِمْ، هَسُمِّه تِنِهْ نُوکِرْ

شومّه مَحْشِرْ روزْ به درگاهِ دادارْ

زمّه کَفِنْ‌رِهْ چاکْ، عَرصاتِ بازارْ

مِرِهْ بَپِرْسِنْ کی بییِهْ ته دِلْ آزارْ؟

ته نُومْ رِهْ زِبُونْ گیرِمِهْ به چارُو ناچارْ

امیر گِنِهْ: مِهْ دِلْ‌رِهْ بَوِردی، بازآرْ

با این دُوستی مِهْ سُوتِهْ دِلْ‌رِهْ نیازارْ

هَسّمِّهْ مَجنونْ، تُو لیلی، مِن خریدارْ

امروزْ کِمِّهْ سُودا که تُو دارْنی بازارْ

شاه‌زادِه سَلومُ و صَد سَلومُ و دیدارْ

اَنْشالّا مِوارِکْ بُو شِمارِهْ اینْ کارْ!

سنگِ مَرْمِرْ بِسازِمْ مِنْ طلاکارْ

مَحَمّد تِنِهْ پَشتْ، علی تِهْ مَددْکارْ!

شاهُونْشاهِهْ که نیشْتِ بیِهْ حَوضِ کوثرْ

قَلِمْ ونه دَسْ نَویشْتِهْ آدِمِ سَرَ (عالِمِ ذَرْ)

یا شاهِ خِراسُونْ مَطْلِبْ دارْمِهْ ته ورْ

تُو مِرِهْ هادِهْ شَرْبِتِ حُوضِ کوثرْ!

اَمیرْ گِنِهْ: سی چینْ بِهْ کِلٰالِه‌یِ سَرْ

اینْ مُعجِزْ دٰارْنِهْ سَرْ کَشِنِهْ دِلٰازَرْ

طُوبیٰ قَدوُلُو شَرْبِتِ حُوضِ کُوثَرْ

دِ خٰالْ تِنِهْ یٰاسَمِنِهْ یٰا مِشْکِ تَرْ؟