قیبله‌م فیراقت، قیبله‌م فیراقت
ئارامم سه‌نده‌ن سه‌وادی فیراقت
دل قه‌قنه‌س ئاسان، جه ئیشتیاقت
طاقه‌ت تاق بیه‌ن په‌ی ئه‌بروی طاقت
۳
دوور جه قامتت، قیامه‌ت خیزان
هیجرت شه‌راره‌ی جه‌هه‌ننه‌م بیزان
کاری پیم که‌رده‌ن مه‌حروومی رازت
نه‌که‌رده‌ن وه دل نیم‌نگای نازت
قه‌در عافیت وه‌صلت نه‌زانام
شوکرانه‌ی شه‌که‌ر رازت نه‌وانام
۶
سا غه‌م کوی شادیم باد وه باد شانو
ته‌مام ئینتیقام وه‌صلت جیم سانو
خاس‌خاس جه شیدده‌ت نائیره‌ی دووری
وه کوی نووره که‌رد سه‌ر تا پای «نووری»